前晚是澳門賽馬會董事總經理李志強娶新抱之喜,在灣仔君悅酒店筵開八十席,到賀名人包括賭王何鴻燊和四姨太梁安琪、富豪劉鑾雄、鄭裕彤、楊寶玲夫婦、李民橋夫婦等。
新人閃電結婚
新郎李柱坤與新娘劉敏穎相識兩年,但拍拖僅四個月便閃電結婚。新翁李志強前晚大讚媳婦說:「畀新抱九十分,生埋孫就一百分。」問他該豪門婚宴是否由他埋單?他說:「做老爺最蠢,要畀晒錢。」
李志強更是賭王何鴻燊及四姨太梁安琪的媒人,前晚賭王獲邀上台致辭,他滔滔不絕表演「棟篤笑」說:「呢個肥仔(指新郎李柱坤)個名改得好,好威水,『柱坤』即係一柱擎天,扭轉乾坤。佢識咗太太兩年,談戀愛就似我隻馬『閃電』咁,閃電四個月就搞掂(結婚)咗啦。」
教𠱁老婆絕招
賭王更在台上取笑新翁李志強講三字經了得,他說:「飛仔強(李志強綽號)係三字經專家,我就講番四字經,『三從四德』就俾我註冊咗,我今晚贈埋第五德畀新郎,呢招我親身試過真係得,就係要『𠱁』得,做男人搵到多少錢就要買定紅、黃、藍、綠、白鑽石喺身,女人對寶石好博愛,一見太太面口唔對路,即刻喺褲袋一粒鑽石塞過去,如果佢唔要,掟落地,唔好執,通常行開半個鐘,粒石就會自動消失㗎啦。」愈說愈興奮的賭王最後在祝酒時更口快快祝一對新人「百年歸老、白髮齊眉」,令台下賓客不禁嘩然。
採訪:DebbieLum
攝影:ChanChiLam