由鄭丹瑞執導、鄭伊健及周秀娜主演嘅電影《分手100次》，今日喺北京舉辦發佈會，同時宣佈8月1日七夕情人節全國開畫。

發佈會三位都有出席，仲同在場人士一齊睇電影嘅新海報同預告片添。

首次合作嘅鄭伊健同周秀娜，喺片中飾演一對相戀八年情侶，佢哋用「分手」作為維繫情感方式，每次女方以分手做威脅時，男方就要委身求和，令女方更得寸進尺...好喇，唔做劇透喇，想睇嘅到時自己去睇啦。

電影中係個「一定錯先生」，現實中同角色又似唔似呢？鄭伊健話似似哋，好似佢喺生活中成個大細路咁，要人照顧，不過都話兩個相愛嘅人，需要互相依賴：「我的不足她來照顧，她的需要我來滿足。畢竟兩人相處，要先講愛，再談理。有很多東西在愛情裡，沒有辦法用講不講理來解釋。」

娜姐就唔太認同自己所飾演嘅角色性格，佢覺得女生可以獨立、有想法，但冇必要對自己男友逼得太緊，咁樣兩個人都辛苦。娜姐表示：「女生也渴望男生的照顧，偏偏有的男生就一直長不大，兩個人相處，需要的是智慧，很多問題不是光靠吵架、說分手就能解決的，而且戀愛裡的問題很多時候是難以分對錯的。」

電影中有講及兩位主角共同經營咖啡店，發佈會上，伊健即場親手調製咗招牌咖啡請現場朋友試飲！


【7.1上街】自己政府自己揀，直播7.1大遊行:
http://71.appledaily.com/