韓國人氣綜藝節目《Running Man》雖然上月底因為Gary退出而傷盡唔少粉絲嘅心，不過就無損《RM》嘅受歡迎程度，各成員繼續有工密密開。

好似金鐘國咁，佢將於美國時間19號喺LA開騷，佢嘅好兄弟李光洙亦都好有心，專登飛咗去LA撐老友，做佢演唱會嘅嘉賓，連日來呢一對孖寶都有喺LA吃喝玩樂，金鐘國仲喺Instagram晒同好兄弟嘅溫馨合照，當中有佢哋喺街頭影嘅背影照，跟住仲一齊開大餐，食美食BBQ。

光洙同金鐘國咁好兄弟，反觀已退出嘅Gary就孤獨好多，因為佢要忙於製作音樂作品，所以都冇時間休息，佢噚晚上載一條自拍片，當中佢就獨自一人食緊麵，只見佢滿臉鬚根，個樣都幾殘吓，唔知係唔係因為搞創作搞到冇得瞓覺呢？粉絲都留言叫佢多啲休息，唔好捱病自己。

另外，由光洙、徐康俊、趙震雄主演嘅tvN新劇《Entourage》收視率唔多見起色，由首播嘅2.264%收視，到噚晚播出嘅第五集只得0.946%，已跌破1%，成績認真慘情。