【亞視副總裁現身】林文龍幫大台新劇造勢 黃翠如:友台會唔會播宣傳片?
黃翠如林文龍
林文龍今年1月加盟亞視,由幕前轉到幕後擔任亞視副總裁。滿肚大計的他,加盟後即計劃在大馬興建亞洲影視城,又講明會挖角,搵昔日合作過的大台藝員過檔。雖然大台有方丈特質,不過世上亦冇永遠敵人,敵台隨時變友台。
今日林文龍現身大台新劇宣傳活動,為下星期推出的新劇造勢,現場還有黃翠如、馬貫東、連詩雅、蘇皓兒、馮素波等出席。貴為亞視高層,身份特殊的林文龍即成活動焦點,他在台上笑言在黃翠如身上「學到好多嘢」,而黃翠如卻反問他說:「友台會唔會播我哋嘅宣傳片?」林文龍即答:「邊個友台呀?Cable呀,你都係Cable㗎喎。」暗示對方是有線出身。當司儀問台上演員「有冇最珍惜嘅人?」馮素波對林文龍說:「我最珍惜係你,你唔係我哋嘅演員,都幫我哋宣傳。」林文龍回應說:「我都好珍惜呢套劇,因為有可能係我暫時最後一套劇。」
事後林文龍接受訪問,談到之後會否再為大台拍劇時,他不置可否說:「咁地球係圓嘅,呢個圈子都係圓嘅,自己唔擔保到啲乜,我唔敢幫無綫答,不過我個人係持開放態度嘅。」貴為亞視副總裁,林文龍表示再踏入無綫的感覺非三言兩語能形容,坦言最重要是大家都是朋友。至於黃翠如則透露在片場只要順着林文龍的意思走就冇問題,她說:「龍爺就係一條龍,冇諗到拍完之後會搖身一變成為副總裁。」她笑言很榮幸可以成為對方現階段最後一個合作的人。
-----------------------------
現已貴為亞視副總裁的林文龍,今日「跨台」為大台劇宣傳。
林文龍指地球是圓的,未有否定將來會否再幫大台拍劇。