冒市委書記之名 - 左丁山

蘋果日報 2008/01/20 00:00


馬迷都知道,馬場內與東莞同鄉會人士有關嘅馬有「赤道小子」、「赤道驕雄」、「東莞之威」、「悅勝豪情」等,其中「悅勝豪情」最近連贏兩場,東莞人在馬場威番一輪。香港有好多東莞人,東莞又近香港,區內工廠林立,台灣商人特多,市面一片繁榮,係中國最富有嘅縣級城市。估唔到嘅係,東莞市委書記之名,居然有人夠膽冒認,直情係笑話。
據《文匯報》(一月十三日)報導,現東莞市委書記劉志庚公開對東莞人大政協表示,佢知道有人冒名行騙。佢話:「凡是掛我的名,說是我的親戚、我朋友的,一定要打電話問過我是不是。」電話號碼係139-2688-2299。
東莞人大,政協開會時發現,起碼有十個人特別打着劉志庚旗號騙人匯錢的電話,其中有一位係香港大馬主張敬山(張氏兄弟有好多匹馬,以電訊為名,例如「電訊少爺」、「電訊大班」)。內地騙徒,雖話膽大包天,但要有內地咁嘅貪腐環境,至可以呃到錢。喺香港,假如商界名人收到一個電話講:「我係×特首,唔該你匯幾十萬到我嘅銀行戶口×××號……」呢位商界名人唔立即報警或者通知特首辦先至奇。呢條橋梗係在內地曾經得米,先至有騙徒反覆使用,希望一啲擦鞋仔中計。蠢到中招之商人,多數唔敢向市委書記公開嘅。
東莞有如此情況,唔知順德、中山等地有冇呢?藉官員貪污成風而冒名行騙之事,全國無日無之,為何中央屢屢提出嚴打貪官,而貪官周街都係?一位朋友W在北京營商,與一位黨員傾過呢個問題,黨員話黨中央有決心有辦法、有組織打擊黨內不正之風,黨有認識錯誤,調整方向之能力。朋友W話:「何不開放民營報紙,讓輿論揭發貪污,嚇阻貪污?」黨員話:「唔得,唔使,黨有自我完善機制。」兩人講反貪污,大纜扯唔埋,一個講永遠正確的黨,政治、經濟、軍事、教育、言論權集於一身,黨會糾正黨風;一個講法律制衡,媒體監督;東方與西方永不接軌。朋友W講咗幾次就識趣收口,不敢再提,等中國共產黨自我糾正中國貪污之風。