順豐速運千億掌門王衛在內地經營的郵遞業，包括香港人以內的外籍人士不准參與，但王衛在香港成長，內地百科網站稱他為香港人，而他似乎仍持有香港身分證，同時亦應持有中國身分證，就好似食兩家茶禮。

有從事跨境金融業務的口痕友同筆者講話，自己經常來往中港兩地，不時同內地監管機構溝通，雖然香港人是掛上中國國籍，但拿的是回鄉證，不是中國身分證，點都會唔太方便，所以對王衛既拎住香港身分證，又拎住中國身分證的模式，大感興趣。

但其實不少人誤會，就算連外傭都有香港身分證號碼，但他們並不是擁有永久居留權的真香港人。王衛內地出生，香港長大、讀書，之後重新入籍中國，拿取中國身份證，事前須表明放棄香港永久居民身份及香港身分證，但身分證號碼不會從此消失，只是燉冬菇成為「R級」人口－－擁有香港入境權，而社會福利、投票權等都會喪失。

所以說，香港長期被形容為中國一部分，國籍（Nationality）上一定要填中國，但實際上公民身份（Citizenship）卻分得那麼細，中港公民身份不能並存，必須要作出取捨，就如零和遊戲。

不過極端情況下，王衛的確有食兩家茶禮可能。幾年前政府曾指出，香港永久性居民身分一經核實，只要仍然符合條件就不會改變，即經常居住、而且未有離港連續36個月以上。假設，王衛為拿取中國身份證，同內地口講放棄香港永久居民身份，但時不時在香港蒲頭，而兩地通報不清晰，的確有機會保留香港永久居民身份，不過可能只係可能，擁有成盤大生意嘅佢，99.9%唔會咁做。

講到尾，力攻大陸生意的香港人，應唔應該放棄香港身份證，拎返張中國身份證？如果你認為CEPA、前海政策未夠好，又有王衛破釜沉舟的決心，只要拎住房產證明，向縣、市公安申請常住戶口，宣布放棄香港永久居民身份，審核通過後，仲要放棄香港身份證，寫書面申請報告、帶備戶口簿同遷居證明等資料，就可以拎到內地居民身份證。不過壞處係要受中國司法制度下控制，如果唔好彩犯事，到時我真係恭喜你啊。

記者：周家誠