就業市道好轉，唔少打工仔攞完份雙糧或花紅，可能會靜極思動，部署喺年內另謀高就，甚至轉換工作環境，但多數人都只係轉去行內其他公司打工，甚少會考慮轉行，尤其係中年人。
《MSNBC》有一篇報道話，新年伊始，好多人都會為自己定下大計，返工做得唔開心嘅人，舊年可能已經開始漁翁撒網、搵工跳槽；但諗住中途轉行又付諸實行嘅人，真係少之又少。
36歲嘅LoveBuzz就話，喺間金融機構做咗15年，雖然可以賺好多錢，但佢懷疑自己根本唔適合做呢行，所以就算升埋做主管，都冇乜進取心再上一層樓。佢話：「細個嘅時候好希望做音樂家或者藝人，但事與願違，踏足社會後一直都冇向住自己嘅夢想出發，𠵱家都唔知點算！」
55歲嘅TheGoose55搭嘴：「都就嚟『夠秤』退休，仲轉咩工吖，留番畀啲後生仔玩啦！」

唔想由低做起　惟有創業

真係想轉行但又唔知做咩好，創業其實都係一條幾好嘅出路。Bethybug話：「原本做緊一份收入幾好嘅工，個人表現亦唔錯，無奈自己真係唔鍾意，所以3年前決定唔撈。想轉行但又唔想嘥時間返學讀書，亦唔想入行由低位再做起，惟有創業。𠵱家喺屋企從事特許經營，專門幫投資者搵業務機會。做呢瓣雖然未必會發大達，至少唔使餓死，而且比以前開心，做人亦積極咗。」
人力資源顧問BrianDrum就話，以佢縱橫業界30年經驗所得，過往接見過約3萬名求職者中，只有3至5%嘅人真係會坐言起行走去轉行。