當年今日

金手指:花旗國樓市將慘過八萬五

蘋果日報 2006/07/25 00:00


如果仲記得,以前格林斯潘仲係聯儲局主席嘅時候。佢老人家曾經講過,花旗國樓市係咪一個泡沫,根本唔係一個需要關注嘅問題。因為,根本就冇一樣嘢叫做「花旗國樓市」,花旗國其實係只係由千千萬萬個地區性樓市組成。而如果有一兩個地區性樓市出現泡沫症狀,繼而爆煲,都唔會負面影響到花旗國總體金融系統嘅健全。繼續用佢老人家嘅思維邏輯去推斷,因為樓市影響唔到總體金融系統,所以樓市發生乜嘢問題,聯儲局都唔應該有相應措施,例如唔應該為樓市加息、減息等等。
當然,佢老人家已經落台,所以一切「地區性樓市泡沫」爆煲後果都唔需要佢去面對。首先,孫柏文絕對唔同意格林斯潘嘅論調,從總體金融系統嘅健全去研究,「花旗國樓市」呢樣嘢的確存在。因為就算大家接受格林斯潘嘅論調,研究花旗國樓市嘅時候,逐個地區性樓市去研究,今時今日都會發覺除咗一兩個「地區性樓市」未出現爆煲情況之外(例如接近石油工業中心地區嘅德州城市休斯頓),差不多所有花旗國主要「地區性樓市」,都係喺到爆緊煲。亦因真係有花旗國樓市呢樣嘢,如果真係爆煲,聯儲局一定要有相應嘅措施。
租金急升通脹亦升
大家可能會問:「樓市爆煲,即係等如樓價會跌,價跌亦等如通縮,咁聯儲局見到通縮出現,仲唔減息?」對於呢個問題,我只可以話邏輯絕對正確,不過錯。
今日,我想叫大家睇睇兩段新聞報告。第一段就係7月20日《華爾街日報》裏面嘅一篇新聞報道,標題「For-SaleSignsMultiplyAcrossU.S.」(花旗國賣樓告示飛升)。報道就係講《華爾街日報》06年第二季嘅地產報告顯示,花旗國越來越多賣家賣樓唔成功,需要大幅減價,不過減咗價都係賣唔出。其中仲訪問咗一位瑞銀地產分析員,佢話亞理桑拿州鳳凰城第二季嘅樓市(Phoenix,Arizona)簡直係「atotalbloodbath」(一場徹底嘅大屠殺)。
第二段報道,就係7月21日ArizonaRepublic(亞理桑拿州共和國日報)嘅一篇新聞。報道話亞理桑拿州正出現「有樓冇人住,有人冇樓住」嘅現象,令到樓價大跌,不過租金急升。而呢個現象亦喺全國出現。
我曾經講過,因為聯儲局很注意核心通脹指數,租金比重非常之大,租金急升就令到通脹亦上升。通脹升,聯儲局就加息,不過就會令到爆緊煲嘅樓市,爆得仲快。最後仲要火上加油,花旗國有好多人買樓係做盡按揭,所以就會好快有一浪一浪嘅負資產出現。銀主盤湧現、破產人數急升、有人自尋短見令到生靈塗炭,特區人民見過,花旗國人民亦將會感受得到,祝佢哋好運!
孫柏文