【做番真正嘅自己】莫竣名罷工支持抗爭者 要堅強地走下去
蘋果日報 2019/12/26 00:30
莫竣名入住請敲門
莫竣名（Louis），因為拍啤酒廣告曾經是網上熱搜人物，其後為ViuTV主持一系列節目《入住請敲門》，再被網民讚賞表現出色。不過，他今年7月卻突然在幕前消失了，湊巧在消息前夕，有網民發現他曾經在反送中運動上多次表態，甚至亦有人聲稱在集會現場見過他的蹤影，於是擔心他「被消失」。事隔兩個月，Louis終於再度現身，他更在IG解釋始末：「I AM BACK!冇見幾個月令大家擔心抱歉了，好多人問我係唔係俾黑警捉咗，放心，我呢啲冷氣軍師冇被捕。呢幾個月唔見咗人係因為公司嘅問題，直至近期先得以解决。詳情唔講啦，總之我已經恢復自由身，同endless creative limited及theholymountain無任何關係。」
回復自由身後，Louis為自己在娛樂圈工作重新編排的同時，仍然繼續為事件發聲，日前Louis接受《蘋果》訪問，談到當日解約原因，他坦言不會再講舊公司的事，目前只會專心將來的發展。之不過提到這段日子，發生了一些事令他有很大的感觸，更加要決心行落去，他說：「如果要話呢個係一個轉變，我會話我只係做番真正嘅自己，其實我喺7月左右已經一直冇收入，愛貓mimi之前又確診淋巴癌，醫佢用咗差唔多十萬，不過最後佢都離開咗，一切都好似好差，但係我喺mimi身上學識咗一樣嘢，就係『堅強』。香港人面對住今時今日嘅困境更加要堅強地走下去，要記住有多少個手足因為呢個政權而失去自由、傷殘，甚至失去生命。一旦放棄，所有嘅努力只會白費，香港只會淪為一個沒有自由嘅鳥籠。」
決意做回自己的Louis，曾經在IG表示，為了對抗爭者作出支持，他坦言會罷工到今年12月31日為止，他說：「其實喺我啱啱恢復自由身嘅時候，已經同ViuTV傾好咗來年初嘅一啲新節目拍攝。除此之外，其他嘅廣告工作都一律推晒。雖然我影響力唔係好大，但都希望可以推動到多啲人參與罷工。罷工唔只係發聲，更係和理非可以做到最低傷亡最有成效嘅實際行動。如果再唔行動，連唱歌嗌口號嘅權利都只會慢慢消失，正如早前有揸保時捷嘅司機播《願榮光歸香港》都被強行拉落車拘捕。」他亦坦言不擔心因停工而影響收入：「喺經濟上我絕對唔係被擔心嘅一位，有好多學生連食餐飯都未必夠錢。如果睇緊呢篇訪問嘅你係一名窮苦學生，希望你主動搵家長尋求經濟支援，有好多家長有錢但唔知點幫。窮唔係一種錯，唔需要因為自己窮而感到自卑。當你他日有能力搵到錢，謹記幫助他人走出困境。」
至於會否因為支持抗爭致失去工作而感到後悔？他說：「首先我認為呢個係一個偽前提（命題），因為一定唔會冇晒工作，尤其係喺香港呢個充滿機會嘅地方。同埋即使賺少咗錢又如何？手足連命都冇埋，我憑乜嘢後悔？」作為香港人和一個中大舊生，Louis引述《新亞校歌》說：「光復香港，時代革命。『手空空，無一物，路遙遙，無止境。亂離中，流浪裏，餓我體膚勞我精。艱險我奮進，困乏我多情。千斤擔子兩肩挑，趁青春，結隊向前行。珍重，珍重，這是我新亞精神。』」
攝影：沈健程
莫竣名早前在IG宣佈回復自由身。（資料圖片）
（資料圖片）