落飛黨第九場三班1400米挑通眼眉，知道跑道形勢，將幾百萬注碼押喺一對前置馬「伽楠」同「天外之天」身上，結果真係畀佢哋轟中，前駒由梁家俊守好位，追足一條直路最後一步僅僅衝贏，「天外之天」於蔡明紹胯下貼欄靠放跑第二，15倍啡燈Q畀落飛黨食到應一應，加埋6.4倍啡燈Win亦得手，埋單計數扣埋本錢，估計佢哋呢場贏超過3,000萬，真係肥過肥仔水！
華將今季多災多難，先後有鄭雨滇同呂卓賢被罰一段長時間停賽，不過梁家俊同蔡明紹一對師兄弟，呢場三班千四米卻夾手夾腳做齣好戲，「伽楠」同「天外之天」包辦前兩名。呢條Q閘前倒水咁倒，由原本70倍一直落到15倍，落飛黨真金白銀賭落去，中到啪啪聲。呢班人好似經常有預知賽果能力，難為普羅馬迷成日畀佢哋打劫，一般小市民雞仔注，中咗都唔慌發達。跑第三係「金獅叻將」，殿軍「大笑大少」，大熱門「碧科」冇段好睇落第，好似驚咗成棚落飛馬咁。
「伽楠」馬主簡文樂乃沉香大王，身家以百億計，大摩說：「『伽楠』今仗贏馬梁家俊功勞甚大，此馬很難騎，俊仔好醒目，守在『天外之天』旁邊有倚傍，令馬兒跑得很舒服，加上步速不快，亦對『伽楠』有利。」