現年40歲嘅韓國「OST女王」白智英，2013年同細佢9年嘅韓劇《屋塔房王世子》男星鄭錫元奉子成婚結婚，不過可惜冇耐傳來小產噩耗。但好彩最後走出小產陰霾，本年10月時宣佈自己懷孕8周，令一眾粉絲都戥佢開心。當時更表示為咗好好安胎，白智英取消巡唱嘅公演。

而目前停工兼陀B 4個月嘅佢，日前就喺自己Instagram晒近況，留言表示：「聖誕節，三清洞約會，喺老公嘅照顧下完全唔知凍，行咗好耐。」字裡行間都感覺到幸福，而上載嘅相中，一張係白智英靠牆企，笑得相當幸福怕醜，另一張就係老公嘅背影，呢兩公婆認真甜蜜！

另外，白智英雖然停工狀態，但日前就宣佈將會現身大後日舉行嘅《MBC演藝大賞》，將係佢陀B後首次公開亮相，唔知到時老公會唔會喺身邊陪住佢呢？