【本報訊】於四大會計師出身的會計師，只要乖乖的肯捱肯搏，努力攀上晉升階梯，終於有日或可成為合夥人，不過，首先你要經過無數個通宵加班的日子。曾於「四大」出任核數師的「80後」Isis，早年決定離開「四大」，在生活與工作之間取得平衡，認為「成世人流流長，我唔使咁趕住要去做合夥人」。
憶述「四大」的生活，Isis笑指凌晨4時下班，緊接早上8時再上班；每個周末有一日要加班亦是不明文規定。這段時間她為了麵包，放棄了生活，「嗰陣生活真係起身就返工，所謂嘅生活咪同同事偷雞，夜晚唔去食飯，改去睇場戲」。

一張照片成轉捩點

不過，Isis於2013年的其中一個加班夜，就經歷重奪生活的轉捩點。當晚凌晨2時，她身處辦公室，忙裡偷閒上facebook，竟發現核數師朋友上載一張與魔鬼魚的合照，「點解呢個人busy season，可以咁嘆，又成日都出海玩，仲可以同魔鬼魚一齊游水呢？」
就因為一張相，她決定「不再通頂」，結束五年半的「四大」生捱，轉工至開曼群島當核數師。「嗰邊好細，可能我7點幾起身，8點鐘返到公司，因為揸車夾埋泊車都係8分鐘，用咗我哋平時坐車返公司嘅時間做嘢。你計番，就算係busy season，我7點就可以放工」。於此加勒比海的小島上，Isis收工後可外出食飯、潛水、更可與魔鬼魚影相。「原來做嘢，你可以完成晒工作嘅同時，都可以有自己生活」。
於開曼群島的生活再好，都會有思鄉的時侯，結果於當地工作一年半後，她決定回港，亦決定不再返回「四大」，改為於宏利（945）當內部審計工作，因為她認為，「其實根本唔會好趕，一世人流流長，我唔使三、四年入面就要做到partner，十年入面我又要點樣點樣。咁我仲有成廿幾三十年去做嘅時候，我又唔覺得有啲嘢係咁趕，我情願攝返晒啲禮拜六日畀自己同埋屋企人。」

記者：倪敏慧