鄧紫棋（G.E.M.）近排忙於佢世界巡迴個唱，同時又要為個人YouTube Channel度橋，最後佢設計咗一副叫做「卡拉O棋」嘅board game，為咗應景，仲會喺K房同人試玩。早排就搵咗林欣彤（Mag）嚟捉棋，佢又搵埋李蔓瑩擔任裁判兼主持。因為要應副棋嘅情境要求，輸咗嘅人要被罰cosplay，包括有pink lady、包租婆裝扮。最抵死嘅紙牌要求，就係要突襲隔籬K房要求合照，輸咗嘅Mag最後喺11名男士包圍之下，影咗一張合照。

雖然大家喺間K房都玩得好開心，不過G.E.M.自爆K房原來對佢嚟講有過唔好嘅回憶，原來佢就係喺K房被飛，佢話：「我同初戀男友第一次過情人節，喺K房佢播咗首《富士山下》我聽，播完就同我講分手。」

另外，G.E.M.嘅世界巡迴演唱會《Queen of Hearts》香港站，門票今日（28號）開始公開發售。