日本攞獎片《小偷家族》今日假東京六本木山嘅TOHO CINEMAS舉行開畫謝票見面會，導演是枝裕和率領安藤櫻、Lily Franky、松岡茉優、樹木希林、池松壯亮同埋兩位童星城檜吏、佐佐木光結現身見影迷。

活動期間，台下閃光燈不絕，6歲小童星佐佐木光結在台不時捽眼又扭身扭勢，安藤櫻就慈母上身，不時照顧身邊嘅光結，雖然樹木希林一把年紀，但在台上佢仍表現精靈，提到多得是枝導演要大家在冬天穿短袖拍夏天戲即顯得一臉痛苦，更投訴要在污糟場地捱冷拍攝，當講到一場安藤櫻同Lily Franky家中做愛場面，安藤櫻立即掩住光結雙耳，仲爆呢場戲係夏天在實景進行，當時仲踫巧落大雨，兩位童星喺該場戲在大雨中跑入屋，城檜吏話拍得好舒服，當問到光結時，佢就話：「好凍，現在都好凍。」為咗賀新片《小偷家族》於康城影展奪得最高榮譽金棕櫚獎，光結即場向是枝導演送上自製嘅紙製金棕櫚，o氹得是枝裕和不知幾高興。安藤櫻就形容呢套電影嘅配搭好似納豆飯一樣，最後是枝導演套用安藤嘅講法，指《小偷家族》係一部納豆電影，每日食都唔會抗拒，希望大家入戲院多多支持。

精選娛聞，喺晒《娛果》
http://fb.com/appledailyent