特區警隊執法越來越騎呢，隨便用胡椒噴霧鎮壓示威者有理，開香檳慶祝卻係犯罪行為，如此奇聞，難怪成為CNN國際新聞。香檳成為犯罪工具，疑似具殺傷力武器，對呢種法國名釀聲譽影響甚大，為免引起外交風波，八方促請特區政府盡快向法國提交調查報告，萬一再鬧出香檳意外，邊個負責?!

建議買香檳實名制

家陣特區對售賣香檳幾乎零監管，民建聯劉華同天王劉華都試過當眾開香檳亂射，疑似「飯醉」（犯罪的普通話諧音），如果警方一視同仁，應該馬上緝拿兩人歸案，八方呼籲佢哋自首，不能知法犯法。和諧社會要維穩，廣州喺亞運期間實施買刀實名制，買生果刀都要登記身份證，免得有人買刀行兇；社運人士林輝建議港府有樣學樣落實買香檳（及其他可噴射式開啟瓶裝飲料如汽水、啤酒）實名制，呢招睇落擾民，佢話利大於弊，事關買香檳麻煩，變相鼓勵更多人飲紅酒，好符合打造香港成為紅酒之都嘅政策。
示威人士帶過黃絲帶、豆腐渣去中聯辦，一律被沒收掃場，證實呢啲物品都係西環禁忌，犯禁品清單再香檳一項，有網民話下次一於帶齊呢幾樣嘢去中聯辦。八方絕對唔鼓勵刁民犯禁，偵查之下，發現涉案香檳，原來嚟自位於油麻地登打士街同砵蘭街交界嘅仁人酒莊，100蚊兩支，好經濟。

涉案香檳購自仁人

仁人係經營幾十年街坊老店，據講亦係80後社運人士買煙買酒嘅「社運酒莊」，八方聽聞80後共商大事時，幾乎所有煙、酒補給都係幫襯仁人，佢哋堅持唔入超市，要撐街坊舖咁話。仁人以平取勝，4蚊一罐啤酒，100蚊有三支紅酒，社運友當日花200蚊買兩支香檳三支紅酒去西環，真係有大事慶祝先捨得o架！
仁人另一出名嘢，係有手捲煙絲賣，唔少懶有型煙民慕名光顧，八方噚日問仁人老闆林先生，有冇留意香檳涉嫌襲擊案件，林老闆話有睇新聞，但唔知道支香檳係仁人啲貨。佢話平時好少人幫襯買香檳，客人多數買紅酒、拔蘭地。
mailto:[email protected]