羅鈞滿早年因為負面新聞，而離開咗大台，唔見佢一排，估唔到佢學做生意，繼早排佢喺美食博覽做生招牌賣生果，執貨、收錢、sell客一腳踢，最近佢仲開埋糖水舖。噚日下午4時，身穿黃色T恤嘅羅鈞滿，喺位於油麻地一間糖水舖入面打點，當有客人入內幫襯，佢即刻殷勤咁去招呼客人。現場所見，幾位客人應該認得佢，仲傾咗幾句，客人先點餐。

事後問番羅鈞滿，佢話間糖水舖投資咗6位數，仲係同朋友夾份開，剛試業3個星期，「有時啲客入到嚟唔知點乜好，咁我咪介紹下，我多數介紹下榴槤甜品。」至於佢自己識唔識整番幾款甜品，「簡單啲嘅焦糖燉蛋、芒果乳酪、沙冰嗰啲啦，太複雜未識，一邊做一邊學。」講到o依家要一腳踢，係咪要放底自己藝人身份，佢話︰「冇，真係冇咁諗，自己都有開製作公司，都有對客人嘅經驗，反而自己企番客人嘅角度去諗，有啲咩細節位要改善。」

o依家羅鈞滿專心開舖做生意，咁仲做唔做幕前呢？佢話︰「唔會放棄做幕前，我上半年做好多登台，嚟緊又會上郵輪登台，仲有接吓啲司儀工作，之後傾緊電影同電視劇，而且近排我又組隊玩電競，去北京比賽，我從來都冇放棄幕前嘅工作。」佢坦言離開舊公司後，時間多咗，可作多方面發展，仲話自己生性咗，「以前做錯叫自己唔好再犯，o依家投入工作都冇時間諗其他嘢，有時間會睇吓電影、電視劇，當係進修。」

精選娛聞，喺晒《娛果》
http://fb.com/appledailyent