黃芷晴最近獲天梭表邀請，擔任首席設計師，為品牌設計以「80」為主題嘅兩條裙同頭飾，今日喺鰂魚涌舉行傳媒預覽，芷晴表示對酬勞好滿意，但因為唔熟悉釘珠片，所以問咗媽咪，媽咪都有幫手，佢仲透露媽媽精神很好。

講到黃日華父親黃桂（芷晴嘅爺爺）已經轉咗院，芷晴話睇報紙先知：「我想同大家講，劉女士（黃日華繼母劉煥珍）一直話我哋冇去探爺爺，但我哋係計劃緊去探爺爺，2月28日我表姐打畀劉女士，諗住打畀劉女士先，方便約個時間見面，點知劉女士用粗口鬧我表姐，我唔明點解要通知記者話好想我哋去探佢，到我哋有計劃去探佢，就咁嘅態度，我唔識處理。」

咁爸爸係咪好嬲﹖芷晴話：「佢（劉女士）將所有嘢都本末倒置，其實我哋好想淡化呢件事，但咁樣聯絡記者會影響到爺爺休息。」

覺得劉女士咁做係為咗乜嘢？芷晴無奈話唔知道，但覺得呢件事唔簡單，因為呢啲恩怨唔係呢幾日嘅事。

咁係咪覺得為咗錢？芷晴話：「可能係其中一個原因。」但劉女士話視錢財如糞土，芷晴說：「所以我哋超級無奈，家家有本難唸的經，我作為後輩，參與唔到呢啲恩怨，我知嘅嘢已經同大家講，點解成日要搵傳媒，我哋想低調，唔發大件事。」會唔會唔經劉女士直接去探爺爺？芷晴話爸爸會安排。