蔡雪瑩今日着住一套黑色連身裙君對三吋高踭鞋出席胡桃夾子嘅活動，佢認咗o依家有咗3個幾月，之後佢又話：「其實本來計劃大仔出世之後兩三年，先會再陀第二胎，因為有湊小朋友都幾辛苦，又有啲嘢唔食得，所以都想休息一排先再生，但發現囝囝開始大個，成日都會拎住啲公仔當係朋友，唔知點解會咁，所以就快啲生多個陪佢。」

蔡雪瑩又話其實已經知道呢胎係女，屋企人都好開心，但佢自己覺得要再生的話，就要再等多一等，佢話：「其實有一仔一女都好開心，加上我自己係一個鍾意買嘢嘅媽咪，因為幫囝囝買衫嘅選擇好少，所以知道係女之後，已經不停咁睇定衫，但係老公就唔畀我買住，因為唔好意頭，要差唔多生先買得。」又話老公成日買父子裝，好唔開心，但嚟緊就可以買啲母女裝。

預產期就係6月，蔡雪瑩都有同大仔講，不過佢都仲細，同佢講都未知，但係就成日同囝囝講佢係哥哥，所以依家講到哥哥，大仔都會知佢係哥哥。雖然大住個肚，但蔡雪瑩今日都仲係着高踭鞋，佢就話：「係啊，依家先着得，一陣老公嚟到就要換做平底鞋。」

更多娛聞，喺晒《娛果》
http://fb.com/appledailyent