住宅樓市熱火朝天，摸貨有賺可謂聽到厭，蘭西今次講吓陰溝裏翻船的實例。上個月有五宗蝕讓個案，不過係蝕少少，唔入肉。
美聯首席分析師劉嘉輝話，二手住宅摸貨要蝕讓嘅有四宗，以舊樓為主，其中炒家活躍嘅荔枝角美孚新邨有一宗，單位係百老滙街21號，喺二月三日以一百三十一萬八買入，兩日後即匆匆以一百三十一萬五沽出，蝕咗三千蚊（未計其他使費）。上月美孚共有七宗摸貨，只得呢一宗係蝕讓。
而灣仔杜智台單位，一月二十日以八十五萬成交，二月四日轉售，成交價八十萬五千，賣方蝕咗四萬五。
劉嘉輝講，較特別嘅係呢宗一手摸貨蝕讓，長沙灣泓景臺單位，喺前年以二百一十六萬二千買入，最近以二百萬八千賣出，蝕咗超過十五萬。

黃金海岸園林設計再攞獎
信和黃金海岸嘅環境出晒名富歐陸風情，屋苑重種咗好多花草作點綴。呢項專長，為佢哋喺今年香港花卉展覽中，贏得私營機構園圃比賽嘅季軍。
信和租務部助理總經理田兆源話，其實佢哋嘅同事唔係專業，只係憑喺屋苑嘅栽種經驗，再喺維園砌番一個同屋苑差唔多嘅園圃，所以對於今次得獎特別開心。
另外，由康文署舉辦嘅私人物業最佳園林大獎，黃金海岸分別喺非住宅同高層住宅組別攞咗銀獎。