【新增動新聞】
利物浦力爭前4，度過完美一周！隨着阿仙奴同曼市雙雄本周齊齊失分，利物浦當然唔會放過良機，周一獨腳戲亦一改「羅賓漢」本色，雖然有「古仔」菲臘比古天奴早早傷出，依然憑「陳仔」安利簡恩上半場補時嘅倒掛金球，作客1:0擊敗屈福特，緊守第3位，而且失分比曼聯同阿仙奴少，保住爭4主動權！

面對幾乎肯定上岸嘅屈福特，利物浦繼續以菲臘比古天奴、羅拔圖法明奴同奧歷治攻堅，但佢哋早早傳來壞消息，古天奴同對方守將馬里亞柏碰撞後整傷右腳，一拐一拐離場後冇辦法繼續，要由傷癒復出嘅拉爾拉拿入替，而屈福特亦有後衛比圖斯退下火線，由基斯甸卡巴些利代替。紅軍上半場空佔控球，但攻門唔算入肉，直至41分鐘先有拉爾拉拿禁區外遠射，眼看笠死對手門將靴里奴高美斯，可惜中楣不入，但簡恩喺補時接應盧卡斯傳中，禁區頂倒掛入網，高美斯欲救無從，為球隊半場領先1:0。

換邊後利物浦繼續施壓，雖然屈福特門將靴里奴高美斯有水準演出，但球隊反撲乏力，直至中段先有伊天卡普爾遠射要勞煩米洛列特飛身撲出，即使及後換入艾錫瑟薩斯同奧卡卡卓卡亦未能扳平，最終輸0:1，賽後34戰40分繼續排13位，至於紅軍35戰69分排第3位，由於失分比曼聯同阿仙奴少一分同三分，只要餘下3場擊敗修咸頓、韋斯咸同米杜士堡，就可以鎖定來屆歐聯入場券！「陳仔」賽後都話：「我從來都冇入過咁靚嘅波，可能細細個試過啦，最緊要我哋全取3分。」佢又表示有信心紅軍餘下3場全勝，進軍下屆歐聯！