曼聯雖然喺英格蘭聯賽盃順利闖過第3圈，星期三以4:1大勝伯頓而打入16強，領隊摩連奴好坦白話如果唔使踢英聯盃，英格蘭球隊或者可以喺歐洲賽事拎到更好成績。

摩佬賽後接受《BBC 5》電台訪問咁樣講︰「如果你問我冇呢個比賽英格蘭球隊係咪會更加好，有可能。或者我哋可以更加精力充沛咁應付歐洲賽事。」

不過，上屆帶領曼聯喺決賽擊敗修咸頓、第五次贏到英聯盃，自己就係第四次捧呢個盃嘅摩連奴亦都話︰「呢個係正式賽事，咁對曼聯同作為領隊嘅我都係重要嘅，我希望球員都係咁諗，我哋有呢個比賽，我哋要尊重贊助商同尊重對手，我哋都盡力比賽。如果可以贏到嘅我哋就贏，如果贏唔到就係因為對手比我哋更出色。」