淺水灣係富豪聚居地,不過,圖中箭嘴所示呢個喺淺水灣酒店對出嘅低密度建築物,唔係住宅嚟㗎,而係車房。話佢係富貴車房一啲都冇錯,此話何解,皆因月租要成六十萬。
車房喺淺水灣道六十號,由大酒店持有,睇番大酒店年報,叫呢度做淺水灣車房,淨係聽個名已經夠晒富貴啦。肯畀咁高租值去租嘅客戶來頭都唔小嘢,就係平治(大酒店叫佢梅賽德斯——奔馳),租期五年,月租六十萬,有五個月免租期。另外,租客可再續約三年,但月租就要六十六萬一千蚊。呢個都可算係紀錄嘞。
聽講平治有意將呢度改做陳列室。就晒啲闊佬,喺酒店歎完茶,施施然行過隔籬揀心水靚車,認真周到。
豪客日花十四萬地鐵商場換機票
地鐵商場本月再搞換購平價機票優惠,名額二千張,前日第一日就送出一千五百張。聽地鐵講,最豪嘅一位總共換咗四十張機票,以每張換購價一千一百八十八蚊計,要四萬七千五百二十蚊,而因為要消費四千五百蚊至可以換兩張機票,呢度又要使九萬蚊,一日之間花逾十三萬八千。
呢名豪客叫Wendy,佢話自己同幾個朋友經常要往返北京同上海,咁啱朋友要買金器首飾,所以一齊去九龍灣德福廣場消費,順便換機票。以有效期八個月計,若只得佢一個人用,每月要出門五次至用得完。
地鐵今次係同港龍合作,推出購物換機票優惠,喺地鐵旗下四個商場消費滿三千蚊(兩張一百蚊或以上嘅唔同店舖發票),就可以用一千一百八十八蚊,換一張往返上海或北京機票,消費滿四千五百蚊可換兩張。每張機票重附有二百蚊地鐵商場現金券。