繼續講返今日亞姐喺廣州嘅初選，有兩位佳麗都披頭散髮現身，頗為嚇人，分別係8號廣東佳麗劉慧，佢仲箍牙全程都口齒不清，完全聽唔到佢講乜。

另外14號任職幼稚園教師﹑嚟自東莞嘅王倚莉個髮型亦出晒事，望落去長髮不時遮住半邊面，令人聯想起「貞子」，雖然0依家係農曆七月，但家陣選緊美o架喎!

另外10號嚟自河南嘅劉培培，就鬥雞加歪咀，雖然外表極盡騎呢，不過佢就自信爆燈，佢喺台上介紹自己時話:「我優點係有自信。」同樣歪咀歪面仲有18號唐穎逸，佢着住極老土款式鞋子，仲要超鬆唔啱腳型，差啲仆倒台上出醜。

最省鏡一批佳麗就係上次深圳選完入選嘅一批，其中嚟自遼寧，現年19歲，擁34C上圍嘅2號韓非兒貎似利智，佢就覺得自己似鍾嘉欣。問佢對入圍有冇信心？佢話:「講冇信心又好假，話有信心又驚入唔到決賽，自己優點是可以透過肢體表達說話，因為本身是芭蕾舞演員。」

亞視高層趙汝強就盛讚今次亞姐面試質素好高，仲話隔離台今日同樣有選美活動話:「亞姐質數一定贏港姐，製作更加唔駛講。」

佢指今日候選佳麗中覺得2號韓非兒貌似利智，直指對方星途將會好好，另外心水佳麗有貌似關之琳嘅4號陳洋鈴及6號張軼珺。