今季篤定再做冠軍練馬師嘅蔡約翰，今晚（27日）快活谷夜馬挑戰高難度，全晚出四隻，除咗第八場補出嘅「歡喜心」季內3Win之外，其餘三隻「常豐裕」、「勁皇子」同「翠龍」今季都未交代。

第二場四班1200米隻「常豐裕」肯定係馬房最失望嘅賽駒，隻馬上季開始服役，第二仗就喺田草1200米開齋，以為會扶搖直上，點知今季冇乜進步，直至上場先跑獲殿軍，已是今季六仗中表現最似樣一場。

今場「常豐裕」由杜利萊換上莫雷拉，但蔡神仙話換人唔係關鍵，而係抽到2檔，因為隻馬好尺寸，由於排1檔嘅「響噹噹」唔係快馬，估計「常豐裕」會如願守到好位，有一定機會。

雖然蔡神仙冇直接講明，但聽得出佢對「常豐裕」季內未交代唔太服氣，難得今場遇上有利形勢，雷神亦要爭冠軍騎師，一定會好好把握。