【李八方online】前綫醫生聯盟迎首位女主席 為夢想放棄高薪厚祿
李八方ONLINE公共醫療醫生協會前綫醫生聯盟
黃嘉恩(左)醫生話,自己少面對傳媒,會向前主席蕭旭亮(右)多多學習。(于健民攝)
全港最大嘅公立醫院醫生組織——公共醫療醫生協會,噚晚舉行晚宴,前會長吳志豪正式卸任,由北區醫院泌尿科副顧問醫生麥肇敬接捧,食衞局長高永文、醫管局主席梁智仁等都嚟祝賀。麥醫生當然受歡迎,不過當晚另一位「女神」都有相當人氣,講緊嘅係啱啱成為前綫醫生聯盟(FDU)史上首位女主席嘅黃嘉恩醫生(Catherine)。
Catherine喺東區醫院婦產科工作咗幾年,不過佢同八方講,原來佢當年會考拎到八優之後,係揀咗「拔尖」入科技大學讀環球商業管理課程架,畢咗業仲喺投資銀行做咗兩年。
點解放棄高薪厚祿呢﹖佢話雖然應付到投行無盡「跑數」嘅壓力,但始終覺得自己唔慣淨係向錢看,「捱到年尾分bonus」,所以把心一橫去中大讀醫科,立志成為婦產科醫生。
Catherine話,作為FDU主席,最希望醫科畢業生年年都全數獲聘,如果政府日後增加有限度註冊醫生,令本地醫生冇工開,一定唔會放過政府。佢亦提到,今年有好多關於醫療事故或者投訴嘅報道,或多或少影響年輕醫生士氣,希望自己或者工會可以紓解前線情緒。
當晚Catherine以一襲黃色晚裝赴會,落落大方,八方問佢係咪追求者眾?佢笑笑口咁話:「零!」