已經81歲高齡嘅大名娛樂老闆、人稱「大少」嘅林建名，人老心不老，出入時經常有女相伴，仲話想搵個伴照顧佢。日前下晝近4點，大少就同一個年約30幾歲女伴行圓方，大少一身黑色bomber jacket風褸，而女伴就黑色背心羽絨外套再襯嗰LV手袋，女伴長髮大眼，斯斯文文咁，有啲似大陸女星佟麗婭，同大少同行嘅仲有一個保鑣。

大少連星期日家庭樂時間都同女伴過，應該關係都好密切，見佢哋一行三人行咗去法式餐廳Le Salon De Thé de Joël Robuchon飲下午茶，由於當時係下午茶黃金時間，大少同女伴要排隊等位，前面仲有6、7個食客齊齊等。堂堂林家大少認真有耐性兼有腳骨力，佢同女伴「罰企」等足半粒鐘先有位，期間見佢哋兩個好似悶悶不樂咁，冇乜傾談，之後就各自拎電話出嚟撳。

由於大少有老花關係，見到大少要除咗眼鏡先瞇起眼先睇清楚嗰手機畫面，二人做咗低頭族一陣，先開始傾偈，仲互相睇對方手機。等咗半粒鐘，大少終於攞到位，見佢點咗唔少食物，有女相伴寧捨好胃口，見佢全程唔停口大快朵頤。

更多娛聞，喺晒《娛果》
http://fb.com/appledailyent