鄭裕彤孫仔鄭志明前日小登科，彤叔仍然留院未能出席，純官做老爺，三位前任、現任特首老懵董、cheap曾同狼振英都畀面出席，仲齊齊坐上主家席，八方老友喺喜宴現場，直擊三代特首雖然同枱食飯，但cheap曾同狼英全程零交流，擺明再見亦不是朋友。反而老懵董算吃得開，除咗間唔中向前下屬cheap曾面授機宜之外，亦有唔少大孖沙埋身向佢問好。
呢場豪門婚宴，吸引到退位後久未露面嘅cheap曾現身，佢冇打招牌煲呔，但睇嚟精神奕奕。人走茶凉，喺婚宴之前嘅酒會，冇乜賓客同cheap曾打招呼，搞到佢做咗孤獨精。百無聊賴，好彩舊老頂老懵董雪中送炭，走上前同佢密斟。老友遠距離所見，聽唔清楚佢哋傾乜，但見老董不時對cheap曾手指指，cheap曾就冇乜表情，唔知係咪有啲尷尬呢？

老董密斟手指指

狼振英夫婦到場後，情況就唔同咗嘞，個個跟紅頂白，不斷爭住同佢打招呼，小霍、郭炳江都走去同狼英吹水，唔知cheap曾睇到會唔會覺得冇癮？上海姑爺羅康瑞喺酒會上同老友狼英傾密偈，朱玲玲就招呼梁太，好有默契。傾傾吓賭王四太梁安琪駕到，開心到話要同狼英合照，咁姑爺咪識做讓路，轉戰老董，同佢老人家寒暄。
入席時，挺梁嘅純官坐喺狼英隔離，老董就同一對新人鄭志明Brian同張美施Macy一齊坐，cheap曾同狼英隔開幾個位，繼續冇偈傾。純官話希望一對新人白髮齊眉、如魚得水。10點鬆啲散場，純官親自送狼英出門，老董都喺前門離開，但係cheap曾就走秘道避記者，都好小家喎。噚日係中秋，純官下午2點半就去醫院探彤叔，約一個小時後離開。

mailto:[email protected]