立法會審議一地兩檢本地立法嘅委員會周五（16日）同周六(17日)又開會喇，後日會繼續與政府官員討論，大後日就係公聽會。公聽會舉行前，立法會收到大批公眾對一地兩檢嘅意見書，大家估下民意企邊一邊？

八方數過，接近20份嘅意見，只係有1份係反對嘅。反對理由係違反《基本法》18條，又認為條本地法例含糊不清，加上中國政權「龍門任擺」、打壓異見人士，令人失去信心，所以極力反對。

其他咁多份都係撐撐撐，包括飲食業潮粵籍職工會、飲食業行政人員協會、香港餐飲專業技師(國家職業資格)協會、香港專業點心師總會同埋香港專業廚師總會，佢哋嘅意見一模一樣，只係組織名唔同，真係慳水慳力。

電器及批發從業員協會，因為行業唔同，所以只係拎咗上面飲食界朋友嘅意見，改一改個行業名、組織名就交。最搞笑係一位市民，佢份意見書嘅標題叫做「我支持高鐵一地兩檢」，內容就係「一如標題」。畀啲心機喇好嗎？

另外有位仁兄嘅意見比較難理解，佢話「一地兩檢好，票價太貴我用不到」，究竟佢係想支持定反對一地兩檢呢？但姑念佢嘅意見幾押韻、幾有創意，畀番1分創意分佢喇！而其他市民、同鄉會之類嘅意見都係千篇一律，總之就係同意、支持、贊成一地兩檢，成功表演一場全人類大合唱一地兩檢就是最好的萬能Key。多謝！