【新增訪問】

與其話告東尼三Win捧香港盃做主角，倒不如話潘頓今午（10日）贏馬兼贏面子，須知佢由第八場開始，連勝香港盃「馬克羅斯」及「辣得很」包辦第八口孖寶，都係接手上仗由其他騎師搏輸跑位置之馬，第一時間幫馬主補中。

當中第九場三班1400米羅富全馬房的大熱門「辣得很」，上仗在郭能胯下前置跑第二，今次掛頭牌負133頂磅換潘頓（令郭能今場坐冷板），沿途守四、五位冇跟得咁前，潘頓一直留到匹馬走勢好穩定，最後200米一騎，即以勁勢彈甩贏1.75馬位。「辣得很」今場單Win及組合獨贏A1分別派33及17.5元。

「辣得很」2015年6月贏田草1400米開齋是由潘頓操刀的，呢次打開轉投羅富全馬房勝門，亦係由潘頓經手，人馬可算有緣。

羅富全說：「『辣得很』今場快步速好有利，馬兒向來忠心肯跑，相信加分升班負輕磅，仍有可為。」

「辣得很」馬主黃紋兒子吳少庭說：「賽前我們信心不太大，因為大賽日預期會是三班強組，不過父親（吳創木）向全哥（羅富全）建議國際賽日出賽，好讓全家人開心入場觀戰，結果我們三代同堂一起影頭馬相，真是好開心。」

「辣」系馬主吳創木早前宴請羅富全及傳媒，在其經營的九龍城泰國業館食蝦擦蟹，估計稍後佢又會設宴慶功。

今日同時是羅富全首度以練馬師身份參戰國際賽日，結果「辣得很」幫佢打響頭炮，佢另有大熱門「精明才子」於第二場入Q，整日出四駒拎一冠一亞，表現算幾有交代。

第九場二至四名順序為「帝豪寶寶」、「估惑」及「閃耀鑽皇」，四重彩派一萬蚊鬆啲。

亞軍「帝豪寶寶」鞍上人見習騎師巫顯東連同第二場頭馬「英勇大師」及第六場頭馬「華美之友」，全日以三匹1號馬與騎師出身的大師兄告東尼合作，豪奪兩冠一亞冇失Q。