貿發局主席吳光正早前請傳媒食晏，向華華等曉以大義，話香港要搞高新科技，貿發局要做科技平台，吳老闆好豪氣咁講，咪等啲做科技嘅人好似孤兒仔咁無人理。
華華寫完吳老闆嘅觀點（見7月27日本欄），收到一位搞高科技嘅「孤兒仔」林先生來信，佢睇完嗰篇報道，向華華大吐苦水。
林先生發明咗一個叫「校園一指通」生物識辨系統，賣畀學校，有學校喺上年暑假採用呢套服務，將學生嘅出席紀錄、圖書館管理及午膳繳費等電腦化。點知用咗唔夠一年，今年6月就被政府整喎咗，冇得做。

唔了解亦唔想了解

華華問林先生點解冇得玩，佢好無奈咁話，學校收到私隱署嘅信，話校方採用呢套服務係違反「個人資料私隱條例」，嚇到學校唔敢再用。咁佢即時去信私隱署，解釋個系統只係識辨學生指紋嘅特徵，而唔係複製成隻手指嘅指紋，唔會侵犯學生嘅私隱。不過私隱署睬你都儍。林生同華華呻，啲政府部門對技術唔了解，亦唔想了解，做嘢死板。咁呢頭叫人搞高科技，嗰頭又ban晒你，點做呀。
華華搵校方，可惜佢哋唔肯講嘢。林先生嘅苦況，吳光正既然有心提攜科技發明，應該同其他政府部門好好了解吓。如果唔係，睇怕佢話想推廣香港作為科技貿易中心，成為貿發局嘅三頭馬車之一嘅希望，好難成真。
李華華