喺香港買地起間house住非富則貴，可以按自己心水改埋門牌號碼仲巴閉，首富李超人搬新屋，將新居門牌由「壽山村道22號」改為「壽臣山徑1-3號」，由於《建築物條例》規定建築物須標明由差估署分配嘅編號，超人幾間屋冇咁做，可能違反法例，最高可被罰款2,000蚊同監禁半年。

方便返學放學

差估署話個幾星期前已出信畀業主，要求展示正確門牌號數，並計劃短期內再派人實地視察，如果未改正，會再次出信，至於會唔會檢控，差估署冇答，只係話會積極跟進。八方噚日去超人新居睇過，發現仍未更換正確門牌號數，就此問過長實公關，不過石沉大海。立法會議員鄭家富督促當局跟緊啲，唔好令市民以為有人可以玩特權。
《蘋果》報道超人搬新屋後，佢同其他傳媒解釋係因為深水灣道舊居殘舊要拆卸重建，有人向八方報料，指超人其實係學孟母，因為傳聞佢孫女下年會入讀聖保羅男女中學附屬小學，明年啓用嘅新校舍喺黃竹坑，搬去壽山村道係要方便孫女返學放學。八方對此講法存疑，事關深水灣道好近黃竹坑，超人孫女返學一定有專車接送，住邊都差唔得幾遠。