前局長周一嶽退任後，唔怕冇人接班做「政壇技安」。前晚民建聯20周年籌款晚宴上，狼振英同Tree根都施展渾身解數，爭奪歌壇「盟主」。狼振英選擇清唱《讀書郎》，用埋讀書嘅方法獻唱，試圖突圍而出；人氣超高嘅Tree根又點會坐以待斃？出動貓紙、甩beat，同唔啱key呢三項撒手鐧上陣，令在場觀眾「聽出耳油」。

睇貓紙甩beat唔啱key

擅玩語言偽術嘅狼振英，獻醜前先打定底，話做特首以嚟最難嘅，可能就係叫佢開金口唱歌，仲叫大家開定逃生門，隨時走避，自嘲一番之後就清唱《讀書郎》。呢首明明好輕鬆嘅歌，唔知點解由狼振英唱起嚟，就好似讀緊書咁硬繃繃，仲有人即場幫佢起個藝名叫「讀書狼」。之後狼振英同司、局長級官員以及民建聯行會成員合唱《友誼之光》，狼振英一直口噏噏，相信唔係飲歌，冇乜「發揮」機會。
狼振英半讓賽狀態下，Tree根更加不容有失。同其他五名民建聯議會新丁合唱《紅日》。攞住貓紙嘅佢，甩beat又甩key，慢咗幾拍又錯幾個音；難得佢面不改容，好有體育精神咁一直唱到最尾，唱完即贏得全場拍爛手掌，風頭明顯蓋過「讀書狼」。八方相信唔少掌聲，係讚揚佢勇字行頭。聽聞Tree根為咗呢場騷，秘密練兵好耐，果然「技驚四座」，相信狼振英都甘心認輸。

mailto:[email protected]