號稱IQ有160嘅勞福局長羅致光雖然智商高，但有啲嘢真係唔識㗎，好似公共衞生同防疫常識，仲有基層民間疾苦！佢噚日喺局長網誌劈頭就好自豪自爆由年初一起，一連22日都喺政總開會傾防疫工作，仲話好多時都係「office alone」，因為冇去人多地方，「回政總全部都是自行駕車，沒有乘公共交通工具」，於是「成就解鎖」，就係「一片口罩都沒有用過」，仲話咁係間接慳咗啲口罩畀有需要嘅人。

曾多次到公眾地方

呢番言論一出街，羅致光即時被鬧爆「何不食肉糜」，試問香港有幾多人好似佢咁，又有私人座駕唔使坐巴士黨鐵，仲有獨立辦公室先？但另一方面，作為問責官員仲要主管勞工同福利呢啲直接同民生有關政策，喺呢個非常時期，竟然可以足足三個星期唔落區唔去了解民情玩自我隔離，難怪個政府嘅抗疫措施離晒地啦！更大問題係羅局長學埋強國病人咁隱瞞行程，因為佢呢段時間唔係真alone，反而多次去過人多嘅公眾地方，包括最少去過三次電台做直播節目再企定定喺電台門口受訪；最少兩次出席抗疫記者會，另外仲有現身過特首辦，亦同過民建聯班立法會議員會面，而羅致光的確全程唔戴罩，但唔知佢點確保呢啲場所同佢接觸過嘅人乾淨衞生囉！

羅致光對於慳口罩嘅標準同處理公共福利上準則一致，都係應慳唔慳，唔應該慳嘅就慳到盡，至於最有需要用口罩嘅基層，777就講明唔會派CSI口罩，唔知羅致光又點將自己慳落嘅口罩畀佢哋呢？