往事只能回味。上年10月，奧運站一個新樓盤推出，有成千人排隊睇樓；阿里巴巴招股，銀行排長龍攞招股書。今年10月，一樣有好多人排隊。醫院有成千人排隊驗腎，政府總部有百幾二百人排隊，排隊做乜？示威請願。
唔係講笑，繼盂蘭節輪米、動漫節入場、奧運買門票之後，香港再現排隊潮，就係排隊上政府總部示威請願。噚日朝，八方路過炮台里，見到人頭湧湧盛況空前。行近啲一睇，有喊苦喊忽嘅長者，有黑口黑面嘅工友，仲有好多嗌生嗌死嘅叔叔嬸嬸。

口號衝着特首而來

請願嘅名目實在太多，通脹、生果金、最低工資，連慈雲山未有自動扶手梯都嚟遊行。請願團體有熟客有稀客，熟客包括職工盟，同埋叫過人唔好上街但係又成日請願嘅民建聯；稀客係一批來自深井嘅老人家，仲有來自日本、南韓同印尼嘅工會代表。睇見咁多示威生客，就可以想像香港嘅市況。
上過炮台里嘅人，都知道嗰度有個鳥籠式大鐵閘。噚日政府總部一時間招呼唔到咁多示威團體，消化唔切咁多元化嘅民間訴求，需要分批放行請願人士，未輪到嘅，就要喺個籠出面排隊等候。
香港人見慣風浪排慣長龍，所以烈日當空苦苦等候，請願人士都好有秩序。記得2003、04年，香港飽受沙士、23條、八萬五摧殘，示威潮一浪接一浪，「示威之都」嘅稱號，一度揚名海外傳媒。事隔幾年嘅𠵱家，金融海嘯冚過來，示威之都嘅請願遊行指數，睇怕都只會有升無減。
咁嘅境況，唔知煲呔睇到有冇感覺？噚日操上政府總部示威嘅小市民，口號標語都係衝住特首而來。工友話：「特首出口術，拖完又拖，低薪工人等到頸都長。」
遊行指數同特首民望係成反比嘅，上年10月，香港人顧住排隊抽新股、唔得閒排隊請願嘅好日子，港大民意調查嘅特首評分，有64.4。到咗今年10月，煲呔嘅評分就跌剩53.9。視民望如浮雲嘅曾蔭權，相信就來可以見到藍天，事關民望已經越來越低，浮雲已經越來越少。

mailto:[email protected]