黃秋生夥拍林海峰（Jan）及韋羅莎合作嘅舞台劇《搞大電影》，噚晚喺演藝學院首演，故事以電影幕後製作人為藍本，配合唔少粗俗嘅對白，秋生同Jan喺劇中都需要講大量粗口台詞。

秋生等人完騷後，聯同導演甄詠蓓一齊會見傳媒，由於今日係秋生嘅56歲生日，劇團安排咗個蛋糕同秋生慶祝。

對於首場演出，秋生同Jan都話好滿意，不過秋生喺演出時唔小心用膊頭撞到Jan，搞到對方嘴唇流血，秋生話：「演演吓見到佢一口血，想拎兩張紙巾俾佢都無機會。」至於Jan就笑言：「下嘴唇啫，o依家都冇咩點用㗎啦。」

講到劇入面兩個要粗口橫飛，秋生話：「我梗係流利啦，平時成日都講㗎。」Jan就話：「我都會講，平時節目關咪都會，唔係好需要練習。」

除此之外，劇中秋生仲要同女主角韋羅莎有錫錫場面，秋生話：「佢好好咀㗎，首先個嘴好軟熟，第二就係好乾淨冇口水，感覺好似我媽錫我咁。」韋羅莎就話秋生都好乾淨，而且係導演最後一刻加呢場落去。旁邊嘅Jan就話：「我每次見到佢哋綵排，都睇到想反胃，秋生啲頭油頭皮出晒嚟。」秋生聞言即反擊：「你呀！流到成面都係汗㖭啦！」