沙田四班草地1200米一向係主要賽程，起碼開鑼至今到本月底，次次田戰都有編排，至於揀邊日出賽，各路人馬都有不同諗法，但葉楚航為「寶成駿星」出王牌跑今期（10日）頭場四班草地1200米，就好明顯有心為馬主蕭澤偉及蕭煒忠兩父子做禮。下個禮拜係忠仔同女朋友拉埋天窗大喜日子，阿航同蕭澤偉相識十幾廿年，如今細姪準備做大人，梗係想幫佢哋贏番場賀一賀。
記得上年蕭澤偉擺大壽，云云練馬師之中，只請阿航一個，可想而知兩人有幾friend。睇番「寶成駿星」上季尾一出谷草1000米得第五，拉士衝得好勁，同場跑第六「騰煌」及第九「創意寶」今季已相繼勝出，今次轉場加程兼用到郭能，蕭澤偉隨時好事成雙。