【紅軍封王】理文行政經理全家都係紅軍躉 周文健欣賞利記組軍方針
蘋果日報 2020/06/26 21:00
英超利物浦紅軍理文周文健紅軍封王
阿健兩度計劃到利物浦，兩次也泡湯，「第一次係前年，撞咗港超比賽，然後就係今年，book咗機票酒店，假都請埋，本身計過時間夾到，但因為疫情去唔到，只能講係命運。」
若因工作與心愛的球隊有機會扯上關係，大概是一眾球迷的理想工作；若能於愛隊工作，更應該是每個球迷的夢想。理文行政經理周文健是利物浦多年球迷，他曾助理文與前利物浦球員商討加盟，雖未成事但已相當難忘，更夢想有一天可到利物浦工作。
阿健全家都是利迷，他自然也追捧紅軍，「01嗰陣鍾意奧雲，快吖嘛，射術又好，打機都鍾意用啦。」現在阿健最欣賞古積特，「鍾意有紀律嘅球員，幾個教練嘅要求佢都做到，相信每個教練都鍾意佢。」與很多人一樣，真正為利物浦「入坑」的，是源於05歐聯決賽，「好感動，嗰晚開始我就好沉呢隊波。」作為利迷，阿健當然常被恥笑，「20年來，呢行又好、圈外又好，每一年都好多人問我，利物浦攞冠軍先定我工作嘅球會攞冠軍先。」結果他經歷過飛馬的無冠時代，轉到元朗於2018年贏銀牌冠軍，去年四月與理文贏得菁英盃，利物浦才終於再贏歐聯，到今日首奪英超。
阿健兩度計劃到利物浦，兩次也泡湯，「第一次係前年，撞咗港超比賽，然後就係今年，book咗機票酒店，假都請埋，本身計過時間夾到，但因為疫情去唔到，只能講係命運。」去年他遠赴馬德里，又被命運玩弄，「前年對皇馬輸咗，我同自己講，再入決賽就會去睇，然後第二年真係入咗，就即book機票酒店，咁啱有朋友有飛可以送畀我。」豈料等了又等，門票最終沒有出現，「只能喺馬德里同外國利迷，仲有喺馬德里街頭遇到嘅香港利迷一齊去酒吧睇波。係唔開心，因為機票都有啲貴，不過攞到冠軍就所有嘢都冇問題啦！」
作為球圈一份子，阿健欣賞利物浦近年的方針，他說：「班主畀時間教練去重組球隊，因為職業足球唔係畀錢買幾多球員就會攞到冠軍，要有耐性。」他認為利物浦體育總監Michael Edwards亦是球隊成功的重要功臣，「除咗老闆有耐性外，高路普想簽咩人，佢都簽到返嚟。」
阿健是理文行政經理，球隊組軍也會參與，更曾與效力過利物浦的球員接觸，「其實一路都收到經紀推介一啲利物浦前球員，有接觸過，但教練團最後決定唔簽。我就梗係想簽啦，如果你問我，我直頭想去利物浦工作！」