當年今日
關於我們

飛短留長:上海髮界10件事$96做大劉

蘋果日報 2006/05/27 00:00


上咗年紀的富豪名人們勁鍾情舊式上海理髮店,可惜現在已買少見少了,年輕一代有幾多個會去/敢去幫襯?印象中上海理髮店只是「阿伯竇」,幫人剪同被剪的都起碼是老竇級。採訪過後,可以話你知這種舊式上海舖亦有太多可愛處,今次帶埋「處男下上海」的權仔,感受吓連大劉都Buy的$96「洗剪吹剃」全包宴。

記者:黃藹瑩
攝影:陳盛臣
Model:權仔
empty
■張師傅先噴濕權仔的頭髮,然後就以熟練的「手勢」幫佢創造新髮型。
empty
■可能你會覺得好搞笑,點解乾住個頭先擦洗頭水,洗頭又要向住「瓷盆」洗?實在答你唔到,張師傅話啲次序一向都係咁。
empty
■上海理髮會幫客人刮鬚、修「滴水」、修眉及面上雜毛。張師傅:「我哋以前學師的時候日日都要練手腕的力度同靈活度,唔易㗎。大劉最鍾意我哋剃鬚的手勢。」
empty
一)坐享富豪級數
身家百億的大劉(劉鑾雄)都愛來這裏幫襯!即係你畀得起$96一樣得到富豪享受。店老闆張師傅話大劉都係收一般價錢,貼士亦唔會特別多,想豪過佢一啲都唔難。除大劉之外,曾江亦是常客,就連范徐麗泰都曾經有幫襯過。
empty
■大劉每次來到都會坐中間這位置,而保鑣就坐左前。張師傅對他最深刻的反而是早幾年寶詠琴逝世時,大批記者在店樓下守候。
empty
■權仔咁大個仔第一次來到上海舖剪髮,表現極之緊張,張師傅一睇就知:「唔使驚,我唔會鏟你個頭,我怕你剪完喊住走,哈哈。」
empty
二)係「剪刮洗吹」唔係洗剪吹!
上海理髮當然包洗剪吹,不過次序問題並非「先洗後剪再吹」,而是先剪後剃,是剃鬚的剃,之後才洗頭,最後一次過吹乾。這個剪刮洗吹四部曲套餐盛惠$96,剪髮包刮鬚,未見識過的男生,有興趣一試嗎?老闆張師傅表示,全包宴收$96已有多年,當門鈴一響,即表示有客到,大家都不用說話,個客好自然會自己坐定定,師傅亦會自動自覺做齊四個動作,算是舊式理髮店內客人與師傅的默契吧!
empty
■刮鬚之前先要用幾條熱毛巾包實塊面,目的好簡單,就係以熱力擴大毛孔容易剃刮。
三)千元孖人刮刀
上海式理髮的另一個賣點當然就係刮鬚服務,所以把刮刀又點可以求其?張師傅話當年學刮鬚之前就先用3個月去練鬆手腕位,至於刮刀還是德國孖人牌好,可惜價錢由幾百蚊加到成千幾蚊一把,「但就冇以前的咁好用。」真係新不如舊。
empty
四)待客三寶
踏入新式的Salon,Reception第一時間會問的都是:「搵開邊位師傅呀?」,高級一點的Salon會問多句你想飲咩,以上物品上海舖欠奉,取而代之的卻是獨有的「待客三寶」:只要你坐定定,師傅立即會為你遞上抹手用的濕毛巾、煙仔同雜誌。張師傅話傳統上這3樣物品都一定要遞上,不過現在都只會遞毛巾,煙仔同雜誌就會放在一旁,客人要的話請隨便。
empty
■濕毛巾及煙仔都是「待客三寶」的其中兩種。
empty
empty
■張師傅話這裏的毛巾並不是早安巾,因為早安巾唔夠吸水,這是他們特別訂做的。
五)縐紙圍頸
上海舖獨有嘅縐紙,同印有店名的白毛巾都是這裏的重要幫手,縐紙防黐髮碎,毛巾吸水力強抹乾頭靠晒佢。
empty
■剪頭髮之前的一個重要步驟,就是要用縐紙圍頸,唔好睇小呢個Step,剪完頭髮的髮碎唔黐頸都係靠佢!
empty
■每個座位前都一定擺放一盒縐紙。
六)3萬元懷舊皮櫈
只有在舊式上海理髮店中才搵到的油壓式「飛髮椅」,懷舊味道令人一見難忘。張師傅話店內的7張「飛髮椅」都是30多年前購入的,當時的售價是300多元一張,現在已不可能於香港搵到了,要買過一張全新的惟有於日本訂回來,盛惠3萬元!
empty
■張師傅話張「飛髮椅」好耐用,用咗30年都無問題,要翻新只需換皮。
七)師傅指定打呔
「你估係《飛短留長》咩?入面劉丹淨係着件白色外套,成個茶餐廳侍應咁!」張師傅笑着批評,他說着制服是上海式理髮店的傳統,「我哋已經唔夠正宗,走咗少少新潮路線(師傅着住Polo恤都打呔!),傳統應該係白恤衫、白外套加黑色領呔,50年代上海式理髮之所以可以取代廣東式理髮,正是呢種整潔同獨有的周到服務。」
empty
■(左起)任師傅、張師傅及卜師傅着Polo恤都打呔!佢哋都慨歎像上海師傅買少見少,「死一個就少一個,又無新人入行,終有一日會式微。」
empty
■望落劉丹的造型又真係幾似侍應。
八)剪髮古董「百髮剪」
明星級理髮店把把鉸剪值$8,000,上海理髮店呢?最貴的鉸剪才$400。師傅話:「技術及手勢才是賣點,用任何一把鉸剪都是一樣的。」店裏的鏟頭髮的「百髮剪」及掃頭皮屑的「篦」,對年輕人來說應該是博物館古董。
empty
■全場最貴的鉸剪來自德國,都係賣四百一把。
empty
■百髮剪其實已被電剃刀取代,不過師傅們認為有時仔細的部份還是用手控的百髮剪最好。
empty
■一想完師傅話這個篦是幫客人掃頭皮之後,我就不敢再攞上手了。
九)蛋撻頭必備髮蠟?
大家總以為舊式理髮店的客人都愛用髮乳或者髮蠟相蛋撻頭,不過張師傅話:「𠵱家呢個年代嘅人鍾意用Gel啦,好少人話要用髮蠟,因為好油好難洗,反正效果都一樣。」明啦!?
empty
■舖內依然有舊式髮蠟,不過已不常用!
十)紅白藍的來歷
新式的Salon大都棄用髮型屋的專用標記紅白藍轉筒,舊式上海舖依然有佢哋影蹤。關於轉筒的來歷,其中一個講法,要追溯於法國大革命期間,革命分子為逃避追捕而匿藏於髮型屋內,革命成功後髮型屋獲插國旗於門外以示表揚,久而久之下就成了髮型屋的標記。
empty
■問4位師傅轉筒來歷,4人都話唔清楚。
上海國賓理髮公司(28955930)
香港銅鑼灣蘭芳道23號電梯按2字樓
營業時間:上午8時30分至晚上7時正 逢星期三休息