曾先後與韓國女星崔智友、孔孝真拍拖嘅韓劇《GoodbyeMr.Black》男星李鎮旭，日前驚爆捲入性侵案。噚日佢喺韓國時間晚上7時現身警署受查，雖然被傳媒包圍，但佢好坦然咁進入警察局，根據韓媒報道，李鎮旭面對傳媒時話：「因為我係公眾人物，就好易相信對方係無辜，誣告係大罪，我會誠實接受調查。」

而噚晚經過長達11個鐘嘅調查後，李鎮旭於韓國時間今日早上6點先離開咗署。據了解李鎮旭向警方表示自己同原告A小姐係通過朋友認識，佢本身對A小姐抱有好感，想過同對方發展成長期交往對象，兩人有發生性關係，過程冇強迫性，但當時佢哋仍未有明確嘅關係。

之前原告曾提供內褲畀警方作DNA對比，而李鎮旭噚晚喺調查過程中亦都提供咗DNA，同時李鎮旭亦提交咗手機短訊內容。至於李鎮旭指兩人係從朋友介紹而認識，但A小姐就否認堅稱係事發當日先認識，亦都強調提告係希望李鎮旭可以真心道歉，同時今日亦會向警方提交驗傷報告作為證據。

另外，李鎮旭近日因為捲入性侵案，令到形象受到影響，佢之前為一間連鎖快餐店擔任代言人，唔知關唔關佢捲入性侵風波，搞到廣告商怕受連累，近日連鎖店官網已不見有佢代言嘅照片，唔知係唔係因為事件而抽起。而李鎮旭代言嘅其他產品亦因為李鎮旭爆出呢啲醜聞，而考慮緊向李鎮旭方面追討賠償。