2017港姐雙料冠軍Juliette(新聞連結： http://bit.ly/2gvVesc )，2017年大台選港姐棄用全民投票，只係由10位評判投票，當中有兩個評判係佳麗嘅導師唔投得，就變咗得8個人投票，喺1號何依婷同5號Juliette當中選冠軍同亞軍，Do姐更手執兩票，當時由Do姐先問啲觀眾，現場個個揀1號，Do姐再問：「你哋睇到1定5，我只係睇到呢邊，嗰邊呢。」森美就話：「你選完都係多一票，所以你嘅決定好重要。」Do姐向住觀眾講：「整體嚟講兩個都好好，唉!5號喇!」麥美恩就大叫：「打和!」Do姐再講：「覺得5號表現係好嘅，都係5號。」森美就話：「即係話冠軍就係5號雷莊𠒇!」

就係呢番對話，唔使「全民投票」之下，今屆港姐就出爐，面對網民洗版式批評Juliette嘅外貌，又指Juliette唔識廣東話代表唔到香港、唔應該攞冠軍云云。

Juliette剛才喺Ig講自己得獎後嘅感受，佢以英語去講，佢就話暫時會用英語嚟開live，因為自己想講清楚對網民惡評有咩感受，加中文本身講得唔好，怕表達錯咗，佢又話自己冇期望所有人都會喜歡佢，知好多人唔支持佢拎冠軍，佢都尊重唔同人嘅意見，認為每一個人都有自己嘅睇法，唔介意大家唔鍾意，亦唔會覺得自己係好有錢、好靚。

對於網民批評佢醜樣，Juliette話因為大家只係睇樣，唔了解真正嘅佢，媒體所講亦唔係完全嘅自己，自己唔係好介意負評，覺得一個人係要愛自己，就知道自己嘅價值喺邊度。講到有報道爆佢有個富爸，Juliette寸網心民可能唔夠聰明，竟然相信呢啲報道，又話開live唔係為自己辯護。

佢坦言喺呢件事上，Juliette覺得好失望，啲人挑起罵戰，不過佢唔會理呢啲批評，佢話自己會變得堅強，好開心能夠勝出，事前都冇諗過會贏。

佢又指自己唔識睇中文，亦唔會花時間去翻譯每一個中文留言，只希望大家可以停止喺佢Ig寫下惡意留言，又有人喺Ig為佢「開火」撐Juliette樣貌唔差，Juliette又問啲人唔滿意呢個賽果，唔通想叫佢放棄個后冠，自己唔會咁做，只會花時間去理自己嘅支持者，佢明白冇可能全部人都鍾意佢，最重要係自己活得開心，繼續做自己，唔會改變自己去討好任何人。