林熹曈噚晚以夢昇華集團董事、行政總裁身份率旗下藝人艾威，到尖沙嘴出席公司舉行嘅傳媒晚宴。

提到之前林熹曈與黃玉郎嘅緋聞，與黃嘅準太太隔空開火(新聞連結： http://bit.ly/2xc0yLp )，有指黃玉郎亦是該公司股東之一，傳媒向林熹曈求證，佢話：「之前公司已經改組，由第一個年代，四個股東包括林文龍、黃玉郎等，到目前為此都係四個股東，但黃生已經冇份喇，而我亦是股東之一。」

追問黃玉郎退股，是否牽涉到之前嘅不快事件，林熹曈坦言：「唔係，咁小事，其實件事已經平息咗㗎喇！(可見過準黃生太太？)冇喎，我哋其實係唔認識嘅，好少可以係場合踫面，o依家黃生同佢太太都與公司冇任何關連。」至於日後可會再與黃玉郎同場出現機會，佢話：「正常都會有，因為我哋都有好多合作項目，一定會有機會，大家都係做嘢！」

林熹曈話，嗰次同準黃太隔空開火事件後，都有同黃玉郎傾過偈，對方仲叫佢要努力工作，要揸緊時間，未來有好多工作要做。佢再話：「其實黃生都知道件事係誤會，解釋咗後，佢都知自己誤會咗我，平息咗，大家都咁大個人，識諗嘅。」

另外，艾威話剛同公司續咗新約，佢仲向傳媒透露一個秘密：「自己冇睇合約內容，價錢都冇睇就簽咗喇！最重要係大家團隊合作精神。」艾威仲話唔需要理會林熹曈同黃玉郎嘅緋聞喎！