當年今日

為緋聞女友獻出兩個第一次
馮仁昭四圍超:王力宏Rap歌討好莫文蔚

蘋果日報 2002/04/25 08:00


王力宏(Leehom)同莫文蔚(Karen)曾經合拍張國榮執導嘅《無煙草》,當時Leehom將佢拍床上戲嘅第一次獻畀Karen,後來佢兩個重傳埋緋聞㖭。Karen加盟新力唱片之後,兩個份屬同門,Leehom再獻出第一次,幫Karen做新歌《那可不一定》監製。

買定pizza等伊人
Karen話Leehom平時開朗又親切,點知做起嘢上嚟好惡、好嚴肅,之不過對Karen就好體貼,Karen錄音當日,Leehom一早幫佢檢查好所有錄音器材,又準備定佢最鍾意食嘅pizza同越南菜,連佢飲開嗰隻礦泉水都買埋,搞到Karen好感動。
Leehom重自己錄咗段讚美Karen嘅rap歌加喺Karen首歌度,內容係「猜不到,給你一個驚喜,在我心裏,你真是了不起。莫文蔚你的聲音讓我感動,那個唱腔像silk一樣,想欣賞……」,搞到Karen冧到震。

劉家良偷閒返港探女
劉家良同姪仔劉永健噚日出現杭州機場,原來佢哋喺內地拍新片《醉馬騮》,但因天雨影響,所以進度受到阻延。佢哋索性返嚟香港唞番幾日,休息吓又可以陪吓屋企人。劉家良話:「內地嘅食物多油同好難食,加上我都好掛住兩個女,所以咪返嚟先囉!」

周啟邦夫婦家財拒外洩
周啟邦夫婦屋企雖然收埋唔少山珍海味,但前晚同佢哋傾偈,佢兩公婆話𠵱家治安咁差,唔會講屋企有啲乜。不過周啟邦夫人話好少喺香港買燕窩,多數係自己走去馬來西亞嘅燕窩山度,買最上品嘅燕窩,不過每次買幾多,佢就唔想多講,免得啲賊人打佢屋企主意。
宣萱戒食翅保鯊魚
宣萱前晚出現喺一個燕窩晚宴,佢話自己唔係好捨得食燕窩,因為燕窩價錢唔平。以前佢就好鍾意食魚翅,不過宣萱學識潛水後,見人點樣為咗魚翅而殺鯊魚,佢就覺得好殘忍,所以佢就連魚翅都戒食埋,𠵱家改食雪耳。佢話冰糖雪耳一樣好好味,而且價錢又平。

蘇永康唔識波經遭冷落
蘇永康(康仔)原來唔鍾意睇足球,每次世界盃有記者問佢鍾意邊個,佢就答碧咸,因為佢淨係識得碧咸,只係知道對方靚仔又有個靚老婆。四年一度嘅世界盃就係康仔最慘嘅日子,因為佢啲老友張衞健、梁漢文、許志安全部都係球迷,人哋好投入咁睇波,佢就坐埋一邊食杯麵,唔知做乜好。

黃卓玲着厚戲服唔怕熱
黃卓玲(Ruby)及羅莽噚日喺馬鞍山郊野公園拍無綫劇《繾綣仙凡間》。Ruby初次拍古裝,喺高溫下着四層厚嘅戲服,非常辛苦,佢話:「有風都唔算太熱,而且套衫好飄逸同好靚,熱都值嘅。」不過因為呢套戲服造型好複雜,Ruby每次都要用個幾鐘頭裝扮。

台灣孖仔同朱茵影靚相
台灣孖仔組合陳騰龍和陳躍虎,最近決定嚟香港發展,佢哋今日將會同朱茵合作幫「現代經典」專業婚紗攝影拍廣告,而下個月底重會推出唱片同寫真集,搵咗攝影師葉青霖幫手影靚相。
呢對孖仔組合重同自己改咗個名叫做「Toptwinz」,證明佢哋係如假包換嘅孖仔喎!

陳慧珊勸失意者多傾訴
陳慧珊噚日喺柴灣為一材料板拍廣告硬照,今次拍呢個廣告有成六位數字酬勞。
對於最近咁多人自殺,陳慧珊就同馮仁昭講:「呢啲係家庭慘劇,其實每個人都會有唔開心嘅事發生,最緊要搵人傾訴,又或者有宗教信仰都可以紓緩壓力,總知搵身邊嘅人開解。」