任賢齊日前到阿根廷參加DAKAR世界級越野車大賽，怎知連環發生意外，因為大雨令賽道變成爛泥路，加上塵土飛揚視野差，小齊先跟前面車手相撞，之後去到爛泥地時更撞樹，成個人飛跌落水潭扭傷腰，結果要終止比賽，好在醫生話除咗腰傷冇大礙，只係暫時唔能夠行房。

之後小齊留喺阿根廷休養，直至11日負傷返港，憂心不已嘅小齊老婆Tina親自接機，讀者陳女士「爆相爆片」分享兩夫婦重逢嘅甜爆畫面，陳女士接受電話訪問表示：「噚日3點幾，喺機場見到任賢齊返嚟，原來佢老婆嚟接機，小齊見到老婆即刻行埋去，兩人開心到攬埋一嚿，佢哋傾咗一陣先行去停車場。」

陳女士話見到Tina遞咗杯咖啡畀小齊，好細心咁買定咖啡畀老公飲，現場仲有十個八個fans嚟接機，送咗啲小禮物同慰問卡畀偶像，由於小齊傷勢未癒行動緩慢，一邊行一邊用手支撐條腰，兩夫婦拖住手慢慢行，助手就幫忙推行李。

據知，小齊返港第二日即去醫院再檢查，醫生話冇大礙，只係拉傷咗腰，而年三十就要飛拉斯維加斯、華盛頓做男人幫演唱會，醫生話唔會影響唱歌，但跳舞唔可以大動作。小齊話過唔會放棄賽車，雖然老婆唔贊成佢玩危險遊戲，但呢個係佢唯一人生夢想，所以老婆都唔會反對，只會默默支持，希望佢唔好再出事