每每人生遇到挫敗時，我都會聽《Korobelniki》呢首歌。未聽過？沒可能！其實只係GameBoy俄羅斯方塊隻背景音樂。

我鍾意玩俄羅斯方塊，係因為我好享受一啲嘢「渣」一聲就冇晒嘅感覺。但人生同玩Game一樣，明明呢個Moment想要長條形磚，你俾個L形我做咩嘢？好啦到你有長條形，你又神推鬼擁下，放錯一格，結果就好似樓價咁，越砌越高。

「我哋不如分開吓。」我唔認同分手要狠，好似渣打（2888）咁啪唔到卡先知俾人炒，咁太絕了，所以分開「吓」個「吓」字好重要，感覺上冇咁狠。我最期望嘅，當然係阿怡爽快地說：好呀，但當然，個天喺當你最想要「凸」形時，佢就唔俾你。阿怡先是錯愕，隨之而來的，係那有如《東張西望》呀叔「睇L住呀！」一樣咁震撼嘅聲線！

「依～～～～～（拖長5秒附仰揚頓挫），我唔制呀～～～～～（5秒用5種音調）」10粒字用5秒去講，破咗馬拉松紀錄未？「明明我哋好哋哋，點解豬你唔要人哋啫～～～（中音轉高音再轉低音）」

呢把聲，足以令我全身毛管戙。阿怡佢係幾好嘅，眼大大，靚靚地咁，以前。同佢拍咗7年，由當時23歲，到今日30歲，佢都冇變過，一直吊高把聲扮晒Cute。「咪就係你呢把聲令我頂唔順囉！30歲人啦，你吓吓喺我面前扮小朋友，你睇吓你件衫，公主到？似咩樣？我想個女朋友係女人，唔係細路女。」

拿拿拿，佢又來啦，扁嘴扮喊，我唔受你呢套架下，「依～～～（3秒，短左了）你呃人嘅～～明明男人就鍾意女仔嗲～～～」

「但唔係好似你咁嗲，即係好似杜如風咁，以前又係咁做節目，依家又係咁做，點解以前就俾人讚有性格，夠真夠喪；依家就俾班高登仔批鬥係港女？依家唔同以前啦，以前就話後生，但佢呢個年紀，配落佢個口氣，真係只會聯想到『港女」呢兩隻字。」阿怡眼神，呢個時候有一點點變化，我唔識形容，總之少了一分嬌俏，多了三分兇狠。

「咁你即係嫌我唔係妹妹仔，係中女啫？」「唔係，我係想講，咩年紀就做番咩年紀應該做嘅嘢，就好似玩俄羅斯方塊咁，正方形係就係可以填到呢個位，但會漏低個窿，你唔係廿幾歲，夾硬做廿幾歲人嘅嘢，咪唔Fit囉。」

佢低下頭，似懂非懂，隱約好似聽到佢講咩「又俄羅斯方塊」，但至少冇啲嗲報嗲氣，咁我繼續，「總之，呢個Moment，我需要一個L形，而你係方形，夾硬一齊，會攬炒GameOver，我哋分手啦。」

微雨中的阿怡突抬起頭！睇到佢黑過關公嘅面口，山雨欲來之勢，凶兆也！「咩L形啫？咩杜如風啫？仲講俄羅斯方塊？你幾大呀？」搞咩，一向Sell嗲嘅阿怡，忽然大家姐上身？「講到尾，你啲男人咪又係低層次，係青春少艾嘅話，就算係嗲妹、港女，做咩都係岩；但一變做微胖中女，話之你做就咩都係錯！」

「你…以前唔係咁架？」「我咩咁咁咁，我本來就係咁粗魯。」怡好似變咗另一個人咁，就好似洪興十三妹著咗公主裙咁，好恐怖！

「套戲話咩《愛撒嬌的女人最好命》，真係害死人。當初你話鍾意嗲，先為你變，依家唔使啦！做自己舒服晒！仲有呀！好心你啦！大個啦，仲玩俄羅斯方塊！更重要係，任天堂已宣佈，將隻Game下架啦！」

「下架？點解我唔知架？」消息震撼程度爆過十三妹著公主裙，「出咗30年，時代變啦。你都30幾啦，仲貪後生女？講到我扮嗲係我錯，夠擔你拎個WhatsApp出嚟，睇吓你個MiMi、GiGi、YoYo係咪唔嗲你！」

《Korobelniki》再次喺個腦度響起，俄羅斯方塊冇了，識扮蠢嘅阿怡又冇了，連帶份工都係，真係好似隻Game咁，「渣」一聲就冇晒。點解係「渣」一聲？因為我係其中一個突然啪唔到卡返工嘅渣打證券分析員。

GameOver

by千頌C＠堆填區
http://fb.com/winbigwok