打足4年，就係為咗一個捧盃機會。暑假後升讀理大嘅19歲甲一新星蔡再懃，噚日喺Nike League貢獻全隊最高嘅25分，助Frigate大勝Cannon殺入U19決賽。連甲一老將譚偉洋睇過佢表現，都力撐呢位後輩超晒班，最具冠軍相。
效力甲一晉龍嘅阿懃，上季一邊讀書一邊幫球隊成功護級，估唔到連放暑假都留喺球場，參戰麥花臣上演嘅Nike League。剛喺拔萃男書院畢業嘅佢，過去4年都無緣決賽，噚日終於皇天不負有心人，喺U19準決賽助Frigate以89:60大勝Cannon。

今決賽鬥澳門姚明

不過，佢嘅男拔戰友葉偉恒就唔係咁好彩，雖然為Cannon取得全場最高嘅27分，但末段就同隊友發生碰撞，搞到撞親膝頭要送院治理。至於另一場4強，就由有「澳門姚明」黎家棟坐鎮嘅Warrior，以88:84險勝Hunter。Warrior決賽鬥5戰全勝嘅Frigate，後者主力阿懃話自己出年超齡，希望可以奪冠留下美好回憶。
譚偉洋都睇好佢捧盃：「冠軍梗係Frigate啦，佢哋唔單止有表現穩定嘅阿懃，中鋒李境泓同小前鋒陳怡富都係得分保證。」旺角麥花臣室內場今朝11點起，仲會上演女子同埋男子U16決賽，球迷可以免費入場，為呢班熱血籃兒打吓氣。