粵劇名伶吳君麗今日黃昏離世，享年84歲。原名吳燕雲的吳君麗，是影壇「八牡丹」之一，她獲封「白牡丹」。黃夏蕙今日接受《蘋果》電話訪問，她證實吳君麗離世：「今晚去晚宴，見到譚炳文囡囡，佢同我講麗姐走咗。」

黃夏蕙跟吳君麗識於微時：「我哋以前細個一齊玩，我姐夫賣酒，仲請麗姐嚟剪綵。」黃夏蕙大讚吳君麗人靚心地好，對朋友濶綽，她說：「早年佢移民新加坡，我過去探佢，佢間屋好靚。我離開時，佢叫我喺機場等一等佢，原來佢拎成篋晚裝送畀我，佢話退出唔唱，將啲靚靚晚裝送咗畀我。」後來吳君麗回港，因戲癮有演出，更重新做過「戰衣」。

黃夏蕙表示知道她近期頻頻進出醫院，但吳君麗很少提及，低調處理，黃夏蕙說：「最後一次見佢係上個月，我仲叫佢好番幫我慈善基金唱嘢，佢仲話好，點知人走咗啦，好可惜。佢呢幾個月入過醫院，佢唔肯畀人知，我哋知佢身體唔係幾好，麗姐個人好怕事，入院好少同人講，嗰次入院係肺積水，我哋唔好意思問。」

吳君麗、凰鳳女、于素秋、鄧碧雲、余麗珍、林鳳、南紅、羅艷卿當年係影壇結拜姊妹八牡丹，羅艷卿接受《蘋果》訪問時聽到麗姐走咗好驚訝:「吓，係咪真架？真係好可惜，我哋當年係八牡丹，但我哋冇合作過，亦好少來往，佢好少出嚟相聚，我都係同南紅見面比較多。多謝你通知我。聽到呢個消息真係覺得好可惜。」蓋鳴暉今日短訊回覆《蘋果》：「收到了訊息也感到突然，我相識這位前輩又和藹又健談，對後輩談笑風生常常説笑的，真的有點捨不得她離開，我們的麗姐一路好走吧⋯⋯」