一匹賽駒跑了十幾場仍未交代，尤其到季尾埋單階段，練馬師唔心急就假，點知馬主會唔會趁暑假來臨，借勢話畀隻愛駒轉換環境，拉走去第二個倉口。

現由賀賢訓練的四歲新西蘭自購新馬「活力寶駒」，便是屢拼未勝，至今15戰只得三次季軍，馬兒已報名下周三（7月3日）谷中四班1800米列正選。

換轉你係賀賢，今場都一定搏甩髀啦！事關就嚟煞科，唞暑後又要重新再操起狀態，今場失手嘅話，都唔知要搞到幾時先贏得。

為咗提升今場勝算，賀賢亦作出一個重要安排，就是由騎開的蘇狄雄，換上級數高幾皮的雷神莫雷拉操刀，戰鬥力當然即時大為提升。

睇番「活力寶駒」，雖然久未建功，但質素絕非庸劣，過去三次得季軍，不約而同俱只負0.5馬位，其實甚有威脅。

上仗田草1800米在蘇狄雄胯下排最外檔欠佳，亦放入第四名，反映近態良好。

而且賀賢跟雷神6月至今合作四戰兩冠一季一第五，數據突出，無疑是給「活力寶駒」帶來一份正能量。

-----------------------------
7月4日起 《蘋果動新聞》只限升級壹會員閱覽
繼續撐蘋果！