韓國影壇盛事「第53屆大鐘獎頒獎禮」喺一片星光黯淡之下正式舉行，由於唔少入圍者都缺席，令到現場場面冷清，當中有唔少獎項得主都要由人代領，就連幕後獎嘅得獎者都唔到場，真係唔畀面。

頒獎禮一開始就先頒發新人獎，當中女新人就由《哭聲》14歲金煥熙得獎，而男新人就由《四等》嘅鄭嘉藍奪得，不過鄭嘉藍因為有工作喺身，就需要搵人代獎。最佳男配角就落喺《密探》嘅嚴泰谷身上，佢仲撼贏《哭聲》黃政民、《隧道》吳達洙等奪獎，不過佢都未有人親自領獎，至於最佳女配角就由《德惠翁主》嘅羅美蘭獲得，佢同嚴泰谷一樣未有親自到場拿獎。

到壓軸頒發其他大獎，當中最佳導演由《寒流黑金》禹民鎬奪得最佳導演獎，佢同時亦憑同片獲得企劃獎及劇本獎，而影帝方面就毫無懸念，由惟一到場嘅李秉憲憑《寒流黑金》封影帝，佢之前已經獲封青龍影帝，今日再下一城封大鐘獎影帝，認真可喜可賀。李秉憲獲獎時就好感激大鐘獎大會，因為佢20年前就喺大鐘獎獲得最佳男新人獎，所以再得獎覺得好開心，佢話：「我覺得任何一個演員都應該企喺呢個舞台，今次好興奮及榮幸參加呢個頒獎禮，不過就好遺憾大鐘獎有咁多問題仍然未解決，希望大家都鼓勵下。」

至於最佳女主角方面，就由《德惠翁主》嘅孫藝珍撼贏裴斗娜、尹茹貞、李泰蘭等成功封影后，不過孫藝珍一直已講咗缺席，所以就由其他人為佢代領獎，而之前孫藝珍喺青龍電影大獎上就失落影后，今次喺大鐘獎繼前年《海盜》之後再度封后。最佳電影就由《寒流黑金》摘下。

全晚以《哭聲》同《寒流黑金》獲得最多獎項，當中《哭聲》及《寒流黑金》先後獲得五個獎，而《德惠翁主》就得四個獎。

另外，李秉憲憑《寒流黑金》已經先後喺大鐘獎、青龍電影獎、釜日電影獎、百想藝術大賞、亞洲電影獎、韓國電影評論家協會獎、韓國電影製作人獎、導演的選擇等獲得最佳男主角，以及喺亞洲太平洋明星環球得明星獎及紐約亞洲電影節亞洲得明星獎，攞獎攞到手軟。