現年38歲的亞視前執行董事盛品儒被爆上月19日跟澳門銳思集團主席蔡一鳳正式註冊結婚，蔡一鳳一直矢口否認曾結婚，但早前婚書曝光時，她在婚姻狀況位置填了「離婚」。昨日有讀者電郵蔡一鳳與前夫的婚紗相爆料，擺明向新婚盛品儒和蔡一鳳贈興。

盛品儒今年7月被拍到當街啜爆𡃁模郭奕芯（Ashina），他事後馬上斬纜，並𠱁番女友蔡一鳳，兩人火速於上月拉埋天窗，蔡一鳳表示希望盡快為盛家添丁。對於跟前夫的婚照流出，蔡一鳳未有不開心，昨日大方在電話回應：「過咗去啦，我同前夫係青梅竹馬，我哋分開咗，但𠵱家仲係好好嘅朋友，我哋仲有聯絡，佢等於我半個屋企人，我之前同James（盛品儒）拍拖，前夫都擔心James花弗，偷偷同我check過佢。」蔡一鳳跟盛品儒先註冊，明年11月才在港補擺婚宴，蔡一鳳再三叮囑不要騷擾圈外前夫，她說：「我自己出咗名啫，唔想畀麻煩佢。」

盛品儒冧爆老婆

今年首個婚後聖誕，蔡一鳳表示已為老公準備了驚喜，她說：「佢又啱啱過咗生日，我買咗鑽石袖口鈕畀佢。」兩人剛新婚，打算留港與家人溫馨過節，問到是否努力製造聖誕B，蔡一鳳風騷說：「我都想，祝福我。」蔡一鳳婚後港澳兩邊走，她最近瘋狂掃名牌高踭鞋，盛品儒日前在facebook貼相還取笑蔡一鳳：「瘋狂！傻的嗎？老婆訂的鞋子一次過到貨！Jimmy Choo、Christian Louboutin……呢兩個著名名牌本來我一個都唔識！𠵱家我一生都會記住！嗚……」盛品儒昨在電話中肉麻冧蔡一鳳：「老婆係娶番嚟錫㗎。」他不介意老婆被爆結過婚：「我唔會理佢過去，我哋將來開開心心就得。」
採訪：陳杰