電視監製梅小青今日去到商台接受訪問，大談《宮心計2深宮計》製作時嘅過程同苦與樂，小青姐話：「由籌備到播出用了兩年時間，縱使拍攝辛苦，但大家見到結果好好，同心協力，睇番片段大家都有好多話題，互相扶持，大家關係躍進。好開心大家反應好好，有人P圖，一次、二次創作，我唔介意，佢哋咁用心做得咁過癮，好過不聞不問。」

小青姐仲話劇集大陸點擊已有15億，一班台前幕後都經常聚會慶功，小青姐話：「最開心係媽咪每晚都會打電話嚟，話好多朋友都話好睇，呢啲係錢買唔到，佢飲茶時都覺得好威，仲坐耐咗，佢覺得好驕傲。」

另提到小青姐喺21歲時客串拍古裝劇，自細已經有不少演出經驗，佢話：「細個屋企好窮，我試過喺酒吧打鼓，嗰陣時都有諗過賺錢養家，但咁樣唔長遠，當時爸爸決定供我去台灣讀書，到到去麗的做助理編劇，佢哋搵唔到童星，我又細粒，就搵我，當時有40蚊。」問小青姐仲有冇興趣再客串？佢話：「唔會喇，真係唔得，如果話發夢呢個簡直係惡夢，又要化妝記對白，所以做演員真係好叻。」

精選娛聞，喺晒《娛果》
http://fb.com/appledailyent